جنگل جنگل

جنگل جنگل

مصنف : ڈاکٹرمحبوب حسن

ضخامت : ۶۵صفحات

قیمت : ۵۰روپے

ناشر : ایجوکیشنل پبلشنگ ہاؤس، دریاگنج،نئی دہلی-۲

ڈاکٹر محبوب حسن اس سے پہلے بھی بچوں کے ادب پر سنجیدگی سے لکھتے رہے ہیں۔ وہ ہیں تو جے این یو کے فارغ التحصیل اور پی ایچ ڈی ہولڈر مگر ان کا دل بچوں کا ادب خلق کرتے ہوئے اسی مزاج میں ڈھل جاتا ہے جس کے گواہ ہم جیسے کئی لوگ ہوں گے۔ تتلی رانی ادب اطفال کے حوالے سے ان کی پہلی کتاب تھی جسے خوب پذیرائی ملی تھی۔ زیر نظر کتاب ’’جنگل جنگل‘‘ میں نثر اورنظم دونوں شامل ہیں۔یہ کہانیاں اور نظمیںماہنامہ بچوں کی دنیا، امنگ ،پیام تعلیم، گلشن اطفال، گل بوٹے،غبار،صدائے اطفال،ہلال،فن کار ،اچھا ساتھی اور باغیچہ جیسے اہم ادبی رسائل کی زینت بن چکی ہیں۔زیر تبصرہ تخلیق ’’جنگل جنگل‘‘ کا امتیازی وصف یہ ہے کہ اس میں شامل تمام تحریریں ماحولیات سے متعلق ہیں۔اس کے ذریعہ ڈاکٹرمحبوب حسن نے جنگل،آبشار، پیڑ، پہاڑ، بادل، بارش،ہاتھی، خرگوش، بلی، بندر، مچھلی، مینڈک، ندی جیسے خالص قدرتی اور ماحولیاتی موضوعات کو اپنی کہانیوں اور نظموں میں خوبصورتی سے پیش کیا ہے۔وہ ماحولیاتی بیداری کے متعلق فکر مند نظر آتے ہیںجس کا اظہار پیش لفظ میں کرتے ہوئے لکھتے ہیں کہ خدا کی بنائی ہوئی اس حسین دنیااور اس کی بیش بہا نعمتوں کا تحفظ ہماری بنیادی ذمہ داریوں میں شامل ہے۔ 

کہانیوں کی بات کریں تواس کتاب میں پانچ کہانیاں ؛’کہانی جنگل کی‘، ’شرارتی شیر‘، ’چالاک بندر‘، ’درختوں کی دوستی‘ اور ’عقلمند خرگوش‘ شامل ہیں جو اپنے دلکش عنوانات کے اعتبار سے بھی نونہالوں کو اپنی جانب متوجہ کرتی ہیں۔ان کہانیوں میں قدرتی حسن و دلکشی کو خوبصورت اسلوب میں پیش کیا گیا ہے۔ان کہانیوں کے پڑھنے سے نہ صرف بچے میں شعور و احساس کی قوت پیدا ہوتی ہے بلکہ وہ غیر شعوری طور پر اردو زبان بھی سیکھ رہا ہوتا ہے۔ بلاشبہ ایسی صورت حال میں ’’جنگل جنگل‘‘ نئی نسل کی ذہنی آبیاری کے لیے سودمند ثابت ہوگی۔ 

’’جنگل جنگل‘‘ میں شامل نظمیں اپنے ماحولیاتی موضوعات اور انداز پیش کش کے اعتبار سے اپنی مثال آپ ہیں۔ ان نظموں میں ایک نوع کا فطری پن، سلاست اور روانی ہے۔ ’’گیت سناتی کوئل‘‘’’ہاتھی آیا! ہاتھی آیا‘‘’’جھوم رہی ہے ڈالی ڈالی‘‘’’اڑ جاتی چڑیا‘‘’’چھائے بادل‘‘’’آتی شام‘‘ ’’پیڑلگاؤ‘‘ ’’سیانی مچھلی‘‘ ’’سحر ہو گئی‘‘ ’’آیا بندرآیا بندر‘‘’’متوالی تتلی‘‘’’بلی موسی‘‘ اور’’مینڈک‘‘ جیسی نظمیں نونہالوں کی ذہنی اور نفسیاتی سطح کے پیش نظرتخلیق کی گئی ہیں۔یہ نظمیں بچوں کے دل و دماغ میں ماحولیاتی اقدار کے تئیں دلچسپی پیدا کرتی ہیں۔ان نظموں میں بہت سی خوبیاں ہیں۔ ان میں روانی ہے ، سادگی ہے، جذبات ہیں ، بچوں کو عام طور پر پسند ہونے والی فضا اور کردار ہیں ، زبان سادہ اور لے نغمگی سے لبریز ہے۔ ان نظموں کی روانی اورنغمگی کے سبب انہیں یاد رکھنا آسان ہے۔ 

بلا شبہ ادب اطفال کی عصری صورت حال کے پیش نظر یہ بات کہی جا سکتی ہے کہ ’’جنگل جنگل ‘‘بچوں کے لیے ایک خوبصورت تحفہ ہے۔ امید کہ یہ کتاب ادب اطفال کی موجودہ روایت کومزیدمستحکم کرنے میں معاون ثابت ہوگی۔ کتاب کا سرورق نہایت خوبصورت اور جاذب نظر ہے۔ کتاب کی قیمت بھی مناسب ہے۔ ’’جنگل جنگل ‘‘ کی اشاعت پر میں ڈاکٹر محبوب حسن کودلی مبارکباد پیش کرتا ہوں۔امید ہے کہ ان کی یہ تخلیقی کاوش ادبی حلقے میں خاطرخواہ مقبول ہوگی۔ 

رضی شہاب

شعبۂ ا ردو، ویسٹ بنگال اسٹیٹ یونیورسٹی،بیرونان پوکوریا،ملکاپور،برسات

نارتھ ۲۴پرگنہ، کولکاتہ-700126